ពង្សាវតារខ្មែរ
និពន្ធដោយៈ
សម្ដេចព្រះសង្ឃរាជ ជួន ណាត
១. ខ្មែរអើយ ចូរចាំជាក់ថា តាមសាវតារ ជាតិខេមរា ធ្លាប់តែថ្កើង ទឹកដីខ្មែរធំ ទូលំទូលាយ សព្វសាយរុងរឿង គេឯង តែងលើកតម្កើង
តម្កល់ជាតិយើង
ចាត់ទុកឡើងជាជាតិច្បង
។
២. អារ្យធម៌ ខ្ពង់ខ្ពស់ឆើតឆាយ បានចេញផ្សព្វផ្សាយ
គ្រប់ទិសទាំងឡាយ ចុងបូព៌ា សាសនាសិល្បៈ ចម្លាក់វិចិត្រ
គំនិតសិក្សា តន្ត្រី ទស្សនវិជ្ជា
ព្រះពុទ្ធសាសនា ជាគោលការណ៍
ខ្មែរផ្សាយទៅ
។
៣. ខ្មែរអើយ ចូរស្ដាប់សាវតារ
ដែលបានចរចា បញ្ជាក់ប្រាប់ថា ពូជខ្មែរថ្កើង
តាំងចិត្តឲ្យមាំ ខិតខំប្រឹងវេញ
បញ្ចេញតម្កើង តម្លៃ នៃជាតិខ្មែរយើង
ឲ្យបានរុងរឿង ជាថ្មីឡើង
តាមសាវតារ
។
ជួន
ណាត
ប្រមាទ និង មិនប្រមាទ
អប្បមា ទោ អមតំ បទំ
បមាទោ មច្ចុនោ បទំ
អប្បមត្តា ន មីយន្តិ
យេ បមត្តា យថាមតា។
សេចក្ដីមិនប្រមាទ គឺការមិនធ្វេសស្មារតី ជាផ្លូវនៃអមតនិព្វាន,
សេចក្ដីប្រមាទ គឺការធ្វេសស្មារតី ជាផ្លូវនៃមច្ចុ
គឺការស្លាប់កើត - កើតស្លាប់
ជនទាំងឡាយណាមិនប្រមាទ ជនទាំងនោះឈ្មោះថាមិនស្លាប់ ជនទាំងឡាយណាប្រមាទ ជនទាំងនោះឈ្មោះថាដូចជាស្លាប់ស្រេចទៅហើយ។
ពាក្យកាព្យឲ្យងាយចាំ
បទកាកគតិ
រីក្ដីប្រយ័ត្ន
មិនឲ្យភ្លាំងភ្លាត់ វិបត្តិស្មារតី
ជាផ្លូវអម្រឹត
វិសិដ្ឋឥតភ័យ ឥតទុក្ខសោកអ្វី
កើតមានទៀតឡើយ។
រីក្ដីប្រហែស ស្មារតីភ្លេចធ្វេស គំនិតតោះតើយ
ជាផ្លូវមច្ចុ
ស្លាប់កើតឥតស្បើយ ឥតកោះឥតត្រើយ
វិលកើតវិលស្លាប់។
នរូអ្នកណា
មានចិត្តក្លៀវក្លា ប្រញឹកប្រញាប់
ខំប្រឹងប្រព្រឹត្ត ពិតតាមធម៌ច្បាប់
អ្នកនោះទោះស្លាប់
ហើយដូចនៅរស់។
នរូអ្នកណា អាប់ឥតប្រាជ្ញា
ប្រមាទស្រស់ៗ
ភ្លេចភ្លាត់ស្មារតី រាល់ថ្ងៃទាំងអស់
អ្នកនោះនៅរស់
ដោយដកដង្ហើម។
ព្រះពុទ្ធទ្រង់ប្រាប់ ថាដូចជាស្លាប់ ស្រេចហើយគួរខ្ពើម
ទោះបីនៅរស់ ដោយសារដង្ហើម អ្នកប្រាជ្ញលោកឆ្អើម
ស្ទើរក្អួតចង្អោរ។
ជនផងគួរគិត គួរផ្ចង់គំនិត
គួរកាត់គួរកោរ
គួរគេចចៀសវាង គួររាងគួរស្ងោរ រំងាស់ចិត្តចោរ
លួចប្លន់កុសល។
យើងជាសាមញ្ញ នៅមានក្ដីក្នាញ់ គ្នាន់ខឹងរចល់
ក៏ពិតមែនហើយ ប៉ុន្តែកុំខ្វល់
គួរប្រឹងតម្កល់
ចិត្តកុំប្រមាទ។
គួរប្រុងប្រយ័ត្ន
ស្មារតីកុំភ្លាត់
កុំភ្លេចឱវាទ
អ្នកប្រាជ្ញទាំងឡាយ មានព្រះជាអាទិ៍
កុំឲ្យឃ្លៀងឃ្លាត
ចាកធម៌សុចរិត៕៚
វត្តឧណ្ណាលោម ក្រុងភ្នំពេញ, ថ្ងៃអង្គារ ទី២៣ កក្កដា ២៥១២ - ១៩៦៨
សម្ដេចព្រះសង្ឃរាជ ជ.ណ. ជោតញ្ញាណោ
ប.អ.ស. - អ.ម.រ.
ស្រង់ពីសៀវភៅស្នាព្រះហស្តក្រោយបង្អស់នៃសម្ដេចព្រះមហាសុមេធាធិបតី ជួន ណាត
កូនលាទៅបួស
១. ហត្ថកូនប្រណម្យ ក្រាបថ្វាយបង្គំ លោកពុកអ្នកម្តាយ ជាព្រហ្មបង្កើត រូបកូនទាំងឡាយ កកើតរូបកាយ ព្រលឹងវិញ្ញាណ
២. ពុកម៉ែមានគុណ គុណលោកសែនធ្ងន់ ពន់រែកពុំបាន ទោះភ្នំសមុទ្រ មាសប្រាក់ប៉ុន្មាន ពុំអាចប្រៀបបាន ស្មើគុណមេបា
៣. តាំងពីក្នុងផ្ទៃ រូបអ្នកម្តាយថ្លៃ ចិញ្ចឹមបុត្រភ្ងា ទោះញើសនិងឈាម ស្រក់ពេញពសុធា ឥតដែលរួញរា ពោលពាក្យថាហត់ ។
៤. ឱ្យតែកូនបាន រស់សុខក្សេមក្សាន្ត ទោះពុកម៉ែអត់ ធ្វើការយប់ថ្ងៃ ទាំងដើរទាំងរត់ មិនដែលពោលហត់
៥.ពុកម៉ែលំបាក ធ្វើការឥតស្រាក ញើសហូរជោគកាយ ទាំងក្តៅរងា ភ្លៀងផ្គរឥតណាយ ឈាមដូរយកបាយ
៦. បើទោះម៉ែអត់ ពុកខំស្វែងរត់ រកបុលខ្ចីចែក ការងារគ្រប់យ៉ាង គ្មានអ្នករំលែក ទ្រាំស្រក់ទឹកភ្នែក ទោះឈឺឬជា ។
៧. ម៉ែអើយកូនខុស ពុកអើយអត់ទោស ឱ្យកូនពុំងារ ហេតុកូនមិនដឹង កូនខ្លាចកម្មពៀរ រូបកូនគ្រប់គ្នា សូមខមាទោស ។
៨. ទោសតាមផ្លូវកាយ មារយាទរាយមាយ មាក់ងាយធ្លោយថ្លោះ កិរិយាឆ្គាំឆ្គង ចចេសរឹងរូស ទទឹងទាំងខុស ហួសជាតិកូនម្តាយ ។
៩. ទោសផ្លូវវាចា ជេស្តីឡូឡា វាចារាយមាយ ទ្រគោះបោះបោក ជេខឹងឥតស្រាយ មិនគិតវែងឆ្ងាយ ជេរម្តាយឪ ពុក ។
១០.រីឯផ្លូវចិត្ត ភ្លេចភ្លាំងឥតគិត គំនិតអាក្រក់ គិតថាខ្លួនត្រូវ មួម៉ៅជំទាស់ ប្រកែករកឈ្លោះ យល់ខុសឥតស្បើយ ។
១១.ទោសទាំងអស់នោះ កូនបានធ្វេខ៉្វីស នឹកឃើញអស់ហើយ ឱះឱ! ពុកម៉ែ ទុក្ខកូនឥតស្បើយ ឱពុកម៉ែអើយ! សូមលោកលើកទោស ។
១២.កូនសូមវន្ទា ក្រាបសំពះលា ពុកម៉ែទៅបួស ដើម្បីលាងបាប កូនសូមសាងផ្នួស សន្សំបុណ្យជួស
បួសជូនពុកម៉ែ ។
១៣.សូមរាល់អានិសង្ស កូនបានផ្ចិតផ្ចង់ បួសជាសាមណេរ និងសីលវតី ហើយណាអ្នកមេ កូនជូនពុកម៉ែ ដោយក្តីស្នេហ៍ស្និទ្ធ
១៤.សូមលោកបានសុខ កុំបីមានទុក្ខ ស្រណុកកាយចិត្ត កូនចេញមកបួស សូមពុកអាណិត សូមម៉ែពេញចិត្ត អនុមោទនាផង.
កើតមកជាមនុស្ស
-កើតមកជាមនុស្ស
កុំរឹងកុំរូស កុំធ្វើជនពាល កុំបោក
កុំប្រាស កុំឆ្កឹះកុំឆ្កៀល កុំដើរតិះដៀល មិនធ្វើការងារ ។
-កើតមកជាមនុស្ស កុំលង់កុំលុះ អំពើពាលា កុំដើរលួចប្លន់
នោះអន់គ្រប់គ្រា ចាប់បានវេទនា ជាប់គុកច្រវាក់ ។
-កើតមកជាមនុស្ស
កុំមានចិត្តទ្រុស្ត កុំដើរកាប់ចាក់ កុំធ្វើជាចោរ
សាមាន្យអបលក្ខណ៍ គេបាត់លុយកាក់ គេជេរផ្ដាសា។
-កើតមកជាមនុស្ស
កុំគិតតែគូស ផ្លូវខុសនោះណា លួច គោ គ្របី
ម្ខាស់គេឈឺផ្សា កុំចិត្តឬស្យា ប្រហារគេឯង ។
-កើតមកជាមនុស្ស
កុំឲ្យពន្យុះ កុំដើរលេងល្បែង កុំផឹកប៉ោឡែ
ដេកដួលគេសែង គ្រួសារចំបែង ព្រោះក្រែងខ្លួនស្លាប់។
-កើតមកជាមនុស្ស
កុំដើរជជុះ ឲ្យគេឈឺចាប់ កុំធ្វើអាក្រក់
ថ្ងៃក្រោយគង់យ៉ាប់ កុំអុជអាលប្រាប់ កើតរឿងឈ្លោះគ្នា ។
-កើតមកជាមនុស្ស
ចេះបែងចែកពុះ គ្រប់ពេលវេលា
ប្រព្រឹត្តតែល្អ រួបរួមសាមគ្គឺ នោះទើបយូរយា ស្គាល់ត្រើយ សុខសាន្ត ។
-កើតមកជាមនុស្ស ដើរតាមគំនូស ចាស់ ពី បុរាណ កាន់យកសីលទាន
ធម៌អាថ៌ជាប់ប្រាណ ដើរតាមលំអាន ព្រះ ពុទ្ធប្រដៅ ។
0 comments:
Post a Comment